Endlich hani mal wieder Ziit funde um es paar neui Föteli vo de Chind z'veröffentliche.

 

Im Herbscht sind bi Euis z'Wilchinge d'Herbschtsunntige. Da isch immer en huufe los, Chilbi, Wiidegustatione, Streichelzoo etc. Am 1. November hämmer am Marc sin 1. Geburtstag gfiiret. 10 Täg spöter simmer mit em Lars zu de Triberger Wasserfäll gange. De Liliane häts det uuu guet gfalle. Glii druf abe isch bi Euis dänn Chilbi gsi. Au det natürlich mit regem Bsuech vo de Karussell. Und dänn isch natürlich no Wiehnachte und Silveschter cho.

 

Das Jahr simmer dänn im Februar i de Skiferie i de Flumserberg gsi. De Chind häts uu guet gfalle. Im Juni hämmer Ferie in Italie (Gardasee und Ca Savio bi Jesolo) verbracht. Ei Wuche sind au Euisi Fründe us Wilchinge mit debi gsi. Mir händs toll gha.

 

Endi Juli händ de Matthias und d'Priska ihren Geburtstag gfiiret am wahrschiinlich schönschte Platz vo Wilchinge. Im Auguscht hämmer Familiefäscht und s'Wuchenend druff de Liliane ihre 4. Geburtstag gfiiret.

 

D'Chind entwickled sich prächtig. D'Liliane bruucht sit Afang April kei Windle meh, au nöd i de Nacht. De Marc hät i de Zwüscheziit afange rede. Sis erschte Wort isch gsi: ÄSSE :-)   Papa chaner jetzt scho länger säge, Mami isch erscht vor ca. 10 Täg jetzt au no dezue cho. Defür hört er jetzt nüme uf mit "Mami" rüefe. Vor 3 Täg hät d'Liliane vo sich us gseit, sie bruuchi kein Nuggi meh i de Nacht und das funktioniert ganz toll.

 

 

 

 

Uf de untestehende Links findsch d'Fotos vo de entsprechende Mönet.

 

 

 

 

 

 

 

 

 

 

 

 

 

06.10.09